თბილისის წმინდა გიორგის  ქართულ-ბრიტანული სკოლა (ბიჯიესი) პირველი ბრიტანული ორიენტაციის სასწავლებელია საქართველოში. იგი 2003 წელს “ბრითიშ ქონექშენის” სახელწოდებით დაარსდა. სკოლამ 2013 წელს შეიცვალა სახელი, გახდა ბრიტანეთის საერთაშორისო სკოლების საბჭოს (COBIS) წევრი და საერთაშორისო სკოლის სტატუსი მიენიჭა. ამჟამად სკოლა ზოგადი განათლების სამსავე საფეხურს მოიცავს: დაწყებითს, საბაზოსა და საშუალოს.

მრავალწლიანი არსებობის განმავლობაში, სასწავლებელში შექმნილი მყუდრო და მეგობრული ატმოსფეროს წყალობით, რომელსაც აქ მოღვაწე პროფესიონალების გუნდი განაპირობებს, სკოლამ ერთ-ერთი ყველაზე წარმატებული სასწავლებლის სახელი მოიპოვა, ხოლო სწავლისა და სწავლების მაღალაკადემიური ხარისხითა და ეროვნული თუ უცხოური უნივერსიტეტების მისაღებ გამოცდებზე მიღწეული აკადემიური შედეგებით, იგი მუდმივად შედის საუკეთესო საერთაშორისო სკოლათა სამეულში.

როგორც სამი მსხვილი ბრიტანული საერთაშორისო საგანმანათლებლო ორგანიზაციის (Edexcel International, LCCIIQ და UCAS) რეგიონალურ ცენტრს, სასწავლებელს აქვს უფლება მოამზადოს საკუთარი მოსწავლეები არა მხოლოდ ეროვნული ზოგადსაგანმანათლებლო პროგრამით, არამედ საერთაშორისო კვალიფიკაციის დაწყებითი (iPrimary) , საატესტატო (IGCSE) და სააბიტურო (A-Level) გამოცდებისათვის, ჩაატაროს ეს გამოცდები საკუთარ ტერიტორიაზე და გზა გაუხსნას მსურველებს ბრიტანეთის, აშშ-ს თუ კონტინენტური ევროპის და აზიის ნებისმიერი უნივერსიტეტისაკენ.

სკოლის კურსდამთავრებულთა 40% უკვე სწავლობს საზღვარგარეთის წამყვან უნივერსიტეტებში, ხოლო დანარჩენი 60% წარმატებით განაგრძობს სწავლას საქართველოს საუკეთესო უმაღლეს სასწავლებლებში.