სკოლა მდებარეობს ქალაქის ცენტრში, მაგრამ, ამავდროულად მშვიდ, უსაფრთხო და ჯანსაღ გარემოში, რომელსაც ერთი მხრიდან აკრავს ტყის მასივი. ეს ადგილი ცნობილია, როგორც აკადემიური ქალაქი. ამ ტერიტორიაზე განთავსებულია არაერთი სასწავლო თუ სამეცნიერო დაწესებულება.

სკოლის წითელი აგურის ორსართულიანი შენობა მანსარდით და პატარა ბაღჩით თავიდანვე განსაკუთრებულ შთაბეჭდილებას ახდენს მნახველზე. მართლაც, რომ ბრიტანული განწყობა იქმნება.

ჩვენი სკოლა არ ეწევა კომერციულ საქმიანობას, ეს არის ხარისხზე ორიენტირებული სასწავლო დაწესებულება, კამერული მცირერიცხვოვანი 16-14 მოსწავლისაგან შემდგარი კლასებით. პირველ სართულზე დაწყებითი საფეხურია განთავსებული. ამავე სართულზეა დირექტორის კაბინეტი, ადმინისტრაციის ნაწილი, დაცვის სამსახური, ცეკვის სტუდია, სამედიცინო კაბინეტი და სასადილო.

მეორე სართულზე საბაზო და საშუალო საფეხურისთვის განკუთვნილი პროექტორებით აღჭურვილი საკლასო ოთახების გარდა, არის ლაბორატორია, კომპიუტერული კაბინეტი, შეხვედრების ოთახი, განსხვავებული დიზაინით გაწყობილი, სამასწავლებლო და დირექცია.

მანსარდა – მოსწავლეებისათვის ერთ-ერთი ყველაზე საყვარელი ადგილი, სადაც განთავსებულია ბიბლიოთეკა, ასამბლეის დარბაზი, ფერწერისა და კერამიკის სტუდია.

სკოლის ტერიტორია მაქსიმალურად არის მორგებული სასწავლო პროცესს. ასევე სრულად არის ათვისებული სკოლის ეზო, სადაც გვაქვს უნივერსალური სპორტული მოედანი, საზაფხულო პავილიონი, სხვადასხვა აქტივობისათვის განკუთვნილი, საბავშვო სათამაშო მოედანი.

სასწავლო ლაბორატორია
სკოლაში მოქმედი საბუნებისმეტყველო საგნების ლაბორატორია  აღჭურვილია კომპიუტერებით, თანამედროვე დანადგარებითა და ჭკვიანი დაფით (Smart Board). სხვადასხვა მატერიალური რესურსებისა და ექსპერიმენტების ჩატარების საშუალებით გარანტირებილია თეორიული მასალის უკეთ გააზრება. სწავლების ამ მეთოდის გამოყენება ხელს უწყობს  სხვადასხვა საგნისათვის საჭირო კვლევითი უნარჩვევების გამომუშავებას.  ექსპერიმენტების ჩატარებისას დაცულია უსაფრთხოების ყველა ნორმა.

ბიბლიოთეკა
სკოლის ბიბლიოთეკა უზრუნველყოფს მოსწავლეებს მდიდარი  სამეცნიერო და მხატვრული ლიტერატურით. ბიბლიოთეკა სკოლის მოსწავლეთათვის ყველაზე  საყვარელი ადგილია.  ეს მრავალფუნქციური სივრცე კომფორტულად არის გაწყობილი მოსახერხებელი მაგიდებითა და სკამებით, რბილი ავეჯის კუთხით, ფერადი პუფებით, კომპიუტერებით, და უზრუნველყოფილია Wi-Fi -ით.

კომპიუტერების ოთახი

ისტ კომპიუტერული კლასი – მსგავსი კლასლაბორატორიები თანამედროვე ტექნოლოგიების გამოყენებით სასწავლო  პროცესის ეფექტურად წარმართვის უზრუნველყოფს, ამაღლებს სწავლების ხარისხსა და აკადემიურ დონეს.

ასამბლეის დარბაზი
ასამბლეის დარბაზში იმართება სხვადასხვა სახის აქტივობები, შეხვედრები სტუმრებთან, პრეზენტაციები, შემაჯამებელი პროექტების წარდგენა ფართო აუდიტორიის წინაშე. კვირაში ერთხელ დაწყებითი, საბაზო და საშუალო კლასების მოსწავლეები ცალ-ცალკე ხვდებიან სკოლის დირექტორს ასამბლეის ფარგლებში და განიხილავენ მოზარდების პიროვნული განვითარებისათვის აუცილებელ ღირებულებითი მნიშვნელობისა და სკოლისათვის აქტუალურ საკითხებს. მასწავლებელთა პროფესიული განვითარების მიზნით ყოველ პარასკევს ტარდება პედაგოგთა სემინარები.

ცეკვისა და აერობიკის სტუდია
სკოლაში ერთ-ერთი ყველაზე დატვირტული სივრცეა ე.წ. სარკეებიანი ოთახი, სადაც დაწყებითი საფეხურის მოსწავლეებისათვის ტარდება ცეკვის გაკვეთილები, საბაზო საფეხურის მოსწავლეებისათვის კი აერობიკა, იოგა და სხვა სპორტული აქტივობები. დღის მეორე ნახევარში კი ფუნქციონირებს ცეკვის კლუბი, რომლის ნორჩმა წევრებმა უკვე არაერთი წარმატება მოიპოვეს.

კერამიკის სტუდია
მოსწავლეებს გამორჩეულად უყვართ კერამიკის გაკვეთილები, რაზეც მათივე ნამუშევრები მეტყველებს. ეს საგანი მრავალმხრივ სასარგებლოა  მათი ესთეტიკური აღზრდისათვის. ასევე, როგორც ცნობილია,  თიხასთან ურთიერთობას, ძერწვას, თერაპიული ფუნქციაც აქვს.

სამედიცინო კაბინეტი

ექიმის მომსახურება – სკოლის ექიმის კაბინეტი აღჭურვილია პირველადი სამედიცინო დახმარებისათვის საჭირო ინვენტარითა და მედიკამენტებით. ექიმი უზრუნველყოფს სკოლაში სამედიცინო კუთხით არსებული ყველა პრობლემის გადაჭრას და, ასევე, ხელმძღვანელობს სკოლის ჰიგიენურ-სანიტარული ნორმების დაცვას.

კვების ობიექტი

კვების ობიექტი – დატვირთული საგაკვეთილო გრაფიკის პირობებში, სკოლა განსაკუთრებულ ყურადღებას უთმობს მოსწავლეთა კვებას: პირველიდან მეხუთე კლასის ჩათვლით მოსწავლეთათვის გათვალისწინებულია ორჯერადი კვება – დილის საუზმე და სადილი; მეექვსედან მეთორმეტე კლასის ჩათვლით კი ყველა მოსწავლე მიირთმევს სადილს, რომლის აუცილებელი კომპონენტებია წვნიანი, ძირითადი კერძი და დესერტი. კერძები მზადდება ადგილზე, ეკოლოგიურად სუფთა პროდუქტისგან. კვების ობიექტში დაცულია ყველა ჰიგიენურ-სანიტარიული ნორმა. ამ პროცესს მუდმივად აკონტროლებს სკოლის ექიმი.

უნივერსალური მოედანი

ჩვენი უნივერსალური მოედანი ყოველთვის დატვირთულია სხვადასხვა აქტივობით. გარდა სპორტის გაკვეთილებისა აქ იმართება სასწავლო წლის დაწყების და დამთავრების ცერემონია. ყოველ 6 მაისს კი ეწყობა ჩვენი მოსწავლეების ნამუშევრების გრანდიოზული გამოფენა-გაყიდვა. ძალიან პოპულარულია მხიარული სტარტები, მინი შიდა სასკოლო ფეხბურთის ტურნირები, რომელშიც პადაგოგებიც მონაწილეობენ.  ყოველი ოთხშაბათის დღის მეორე ნახევარში კი სტადიონი ეთმობა სკოლის საფეხბურთო კლუბ ,,Lions’’-ის ვარჯიშს.

სკოლის ეზო

სკოლის  ეზო, რომელსაც ტყის მასივი აკრავს, მაქსიმალურად არის ათვისებული. სკოლის საგაკვეთილო განრიგი ისეა აგებული, რომ დღის განმავლობაში დაწყებითი საფეხურის მოსწავლეები რამდენჯერმე გადიან ეზოში. პატარებისთვის ერთ-ერთი უსაყვარლესი  აქტიური დასვენების პერიოდია. უსაფრთხოების მიზნით, სკოლის შენობაში სირბილი აკრძალულია, ეზოში კი დამრიგებლების მიერ ორგანიზებულ მოძრავ თამაშებში ბავშვები ხალისით ერთვებიან. აქვე მოწყობილია საბავშვო მოედანი სხვადასხვა ტიპის გასართობი “ატრაქციონებით”. დაწყებითი და საბაზო-საშუალო საფეხურების დასვენებები სხვადასხვა დროს არის. საბაზო და საშუალო საფეხურის მოსწავლეები ორ დიდ დასვენებას იყენებენ სხვადასხვა სპორტული თამაშებისთვის. დასვენებების დროს ეზოში ყოველთვის მორიგეობს დაცვის თანამშრომელი.

საზაფხულო პავილიონი

ჩვენს ეზოს ამშვენებს ცნობილ მხატვართა ნამუშევრებით გაწყობილი საზაფხულო პავილიონი, სადაც ტარდება საინტერესო აქტივობებით დაგეგმილი გაკვეთილები ღია ცის ქვეშ. ეს კუთხე შეიძლება იყოს როგორც საგამოფენო სივრცე, ასევე bake-sales დროს ყველაზე ,,გემრიელი’’ ადგილი სკოლაში.

მოსწავლეთა საბჭო

უკვე რამდენიმე წელია, სკოლაში აქტიურად მუშაობს მოსწავლეთა საბჭო, რომელშიც ყველა კლასს თავისი წარმომადგენელი ჰყავს. საბჭოს წევრები 2 კვირაში ერთხელ იკრიბებიან და ერთად განიხილავენ თავიანთი კლასებისათვის აქტუალურ თუ სკოლისათვის მნიშვნელოვან მიმდინარე საკითხებს, გეგმავენ საერთო ღონისძიებებს. მოსწავლეთა საბჭო სკოლის ცხოვრების ძალიან მნიშვნელოვანი რგოლია.

უსაფრთხოების სამსახური

სკოლაში 24 საათის განმავლობაში  უსაფრთხოებასა და წესრიგს  უზრუნველყოფენ დაცვის პროფესიონალი თანამშრომლები. სკოლის შენობა და ტერიტორია აღჭურვილია უახლესი დაცვითი, პერიმეტრული, სახანძრო და გარე ვიდეოკონტრო-ლის სისტემებით.